Jahan Bhar Ke Haseenon Se Haseen Tar Ae Haseen Tum Ho
Jamal e Zaat Ho , Noor Elahi al Aalameen Tum Ho

جہاں بھر کے حسینوں سے حسیں تر اے حسیں تم ہو
جمال ذات ہو، نور الہ العالمیں تم ہو

گنہگاران امت کا سہارا بالیقیں تم ہو
کرم ہو، فضل ہو اور رحمت اللعالمیں تم ہو

بہ جسم ظاہری زِندہ، نبی آخریں اور غیب کے عالم
ہو اُمی ظاہراً پر حامل علم مبیں تم ہو

ہو محو ہم کلامی باالمشافہ اور بے پردہ
کہ عین وصل میں بینائےذات العالمیں تم ہو

مری جانِ تمنّا ہو، مرا مقصد مرا حاصل
مرا علم الیقیں، عین الیقیں، حق الیقیں تم ہو

نقاب رخ الٹ دو اے سرور جان مشتاقاں
متاع عاشقاں ہو آرزوئےمخلصیں تم ہو

نگاہے کن بہ خستگان ملت بیضا
امیر کارواں، منزل رسا، کار آفریں تم ہو

سلام اے رہبر دوراں! سلام اے مرکز ایماں
سلام اے حامل قرآں! کہ خوددین متیں تم ہو

سلام اے کار ساز و دستگیر ناقص و کامل
طبیب ہر مرض ، چارہ گر قلب حزیں تم ہو

سلام اے جان عشاقاں، سلام اے روح جاں بازاں
منور کر دو دل مرا کہ نور اولیں تم ہو

سلام اے شاہکار حق! سلام اے پیکر رحمت
سلام از خاورعا جز کہ میرے بس تمہیں تم ہو

خاورسہروردی
Khawar Soharwardy

Tere Dar Se Door Hat Kar Main Kahin Na Ja Sakon Ga
Jo Utha Diya Yahan Se Koi Raah Na Pa Sakon Ga

تیرے در سے دور ہٹ کر ، میں کہیں نہ جا سکوں گا
جو اُٹھا دیا یہاں سے ، کوئی راہ نہ پا سکوں گا

میری زندگی تمہیں سے ، میری بندگی تمہیں سے
تیرے نقش پا پہ چل کر ، تیرے رب کو پا سکوں گا

جو پکڑ لیا ہے دامن، پہ ہزار نا توانی
نہ چھڑایئے خدا را، کہ کہیں نہ جا سکوں گا

تیری پاک صحبتوں میں ، جو ملا ہےراز ہستی
نہ کہیں سے مل سکا تھا، نہ کہیں سے پا سکوں گا

وہ جو با ر امانتوں کا ، نہ اُٹھا سکا تھا کوئی
تیری بندہ پروری سے ، اسے میں اُٹھا سکوں گا

میری سجدہ ریزیوں کو، تیرے سنگ ِ آستاں سے
وہ ملا ہے ذوقِ سجدہ، نہ کبھی بھلا سکوں گا

میرے دل کے چند ٹکڑے ، للہ قبول کیجے
نہ انہیں بساط و ساماں، نہ کچھ اور لا سکوں گا

میری تشنگی کا عالم ، ہر لحظہ بڑھ رہا ہے
میرے ولولوں سے پوچھو، کیسے بجھا سکوں گا

یہ بجھا بجھا سا دیپک ، ارمان و آرزو کا
تیرے حسنِ ضوفشاں سےدائم جلا سکوں گا

میرا من ہو تیری بستی، میرا تن ہو تیری نگری
کہ میں داغ ہائے سینہ ، یونہی جلا سکوں گا

پنہائیاں یہ دل کی، مہمان کی ہیں طالب
تجھ سے یہ گھر سجے گا ، تجھ سے بسا سکوں گا

سرِ عا شقے علامت ، دلِ عاشقے سلامت
زہے جذبہء شہادت کہ نہ سر اُٹھا سکوں گا

میر اسلسلہ قلندر  میرا واسطہ محمدؐ
اسی واسطے سے خاؔور میں خدا کو پا سکوں گا

خاورسہروردی
Khawar Soharwardy

Saanay Ki Sanatoun Ka Qareena Tumhi Tou Ho
Es Husan e La Makan Ka Khazina Tumhi Tou Ho

صانع کی صنعتوں کا قرینہ تمہی تو ہو
اس حسنِ لا مکا ں کا خزینہ تمہی تو ہو

ختم الرسل ہو شا ہد و مشہود و نورِ دات
دانائے راز حاضر و بینا   تمہی تو ہو

فطرت کے جس کمال پر ہے قد سیوں میں شور
وہ شاہکار ِ حق وہ نگینہ  تمہی تو ہو

دنیا و ماسوا ذات کے عارف و حق شناس
کون و مکان کے راز کا سینہ  تمہی تو ہو

عرفاں کی مے جو ذات مقدس میں ہے چھپی
اس مے کا جا م کیف ہو مینا تمہی تو ہو

ہر آن مل رہا ہے یہ معراج سے سبق
انسانیت کا اوج قرینہ  تمہی تو ہو

جس پرتوِ جما ل کا حامل نہیں کوئی
ان سب تجلیّات کے بینا  تمہی تو ہو

روح الامیں کے جس جگہ جا کر قدم رکے
اس سے وراکے راکب و بینا  تمہی تو ہو

لا ریب غیب داں  ہو حیات النبی ہو تم
ذات و صفات حق کا قرینہ  تمہی تو ہو

سا رے نبی ہیں جس کی امامت پہ مفتخر
اسس مرتبہ کے اہل حسینا تمہی تو ہو

رحمت ہر اک جہاں پہ تمہاری محیط ہے
رحمت کا بے حساب  خزینہ  تمہی تو ہو

اللہ کو ہے تمہاری شفاعت کا احترام
امت کے عاصیوں کا سفینہ تمہی تو ہو

جس زندگی سے ہے کوئی قائم بہ ذات حق
حقا وہ روح زیست و جینا تمہی تو ہو

جس کے طفیل ساحل و منزل پہ جا لگیں
اے جانِ بحر و بر وہ سفینہ تمہی تو ہو

وہ نور جس سے ذرہ خاوؔر ہو آفتاب
ایسی شعاع نور کا سینہ  تمہی تو ہو

خاورسہروردی
Khawar Soharwardy