Bullehya Ki Jaana Maen Kaun
بلھیا کی جاناں میں‌کون

نہ میں‌مومن وچ مسیتاں، نہ میں‌وچ کفر دیاں ریتاں
نہ میں‌پاکاں وچ پلیتاں، نہ میں‌موسیٰ نہ فرعون

بلھیا کی جاناں میں‌کون

نہ میں‌اندر بھید کتاباں،نہ وچ بھنگاں نہ شراباں
نہ وچ رنداں مست خراباں، نہ وچ جاگن نہ وچ سون

بلھیا کی جاناں میں‌کون

نہ وچ شادی نہ غمناکی، نہ میں‌وچ پلیتی پاکی
نہ میں‌آبی نہ میں خاکی، نہ میں‌آتش نہ میں پون

بلھیا کی جاناں میں‌کون

نہ میں‌عربی نہ لاہوری، نہ میں‌ہندی شہر نگوری
نہ میں ہندو ترک پشوری، نہ میں‌رہندا وچ ندون

بلھیا کی جاناں میں‌کون

نہ میں‌بھید مذہب دا پایا، نہ میں‌آدم حوا جایا
نہ میں‌اپنا نام دھرایا، نہ وچ بیٹھن نہ وچ بھون

بلھیا کی جاناں میں‌کون

اول آخر آپ نوں جاناں، نہ کوئی دوجا ہور پچھاناں
میتھوں ہور نہ کوئی سیانا، بلھا شاہ کھڑا ہے کون

بلھیا کی جاناں میں‌کون

Bulleh Shah
بلھے شاہ