Moun Aayi Baat Na Rehndi Ay
مُونہہ آئی بات نہ رہندی ہے

جھوٹھ آکھاں تے کچھ بچدا ہے
سچ آکھیاں بھانبڑمچدا ہے
جی دوہاں گلاں توں جچدا ہے
جچ جچ کے جیبھا کہندی ہے

مُونہہ آئی بات نہ رہندی ہے

جس پایا بھید قلندر دا
راہ کھوجیا اپنے اندر دا
او واسی ہے سُکھ مندر دا
جتھے کوئی نہ چڑھدی لہندی ہے

مُونہہ آئی بات نہ رہندی ہے

اک لازم بات ادب دی ہے
سانوں بات ملومی سبھ دی ہے
ہَر ہَر وچ صورت رب دی ہے
کتھے ظاہر ہے کتھے چھپیندی ہے

مُونہہ آئی بات نہ رہندی ہے

ایتھے دنیا وچ انھیرا ہے
ایہہ تِلکن بازی ویہڑا ہے
وڑ اندر ویکھو کیہڑا ہے
کیوں خلقت باہر ڈھونڈیندی ہے

مُونہہ آئی بات نہ رہندی ہے

ایتھے لیکھا پاؤں پسارا ہے
ایہدا وکھرا بھید نیارا ہے
اِک صورت دا چمکارا ہے
جیوں چِنگ دارو وچ پیندی ہے

مُونہہ آئی بات نہ رہندی ہے

کِتے ناز ادا دکھلائیدا
کِتے ہو رسول مِلائیدا
کِتے عاشق بن بن آئیدا
کِتے جان جدائی سہندی ہے

مُونہہ آئی بات نہ رہندی ہے

جدوں ظاہر ہوئے نور ہوری
جل گئے پہاڑ کوہِ طور ہوری
تدوں دار چڑھے منصور ہوری
اوتھے شیخی مینڈی نہ تیندی ہے

مُونہہ آئی بات نہ رہندی ہے

جے ظاہر کراں اسرار تائیں
سبھ بھل جاون تکرار تائیں
پھر مارن بلھے یار تائیں
ایتھے مخفی گل سوہیندی ہے

مُونہہ آئی بات نہ رہندی ہے

اساں پڑھیا علم تحقیقی ہے
اوتھے اکّو حرف حقیقی ہے
ہور جھگڑا سب ودھیکی ہے
اینویں رولا پایا بہندی ہے

مُونہہ آئی بات نہ رہندی ہے

اے شاہِ عقل توں آیا کر
سانوں ادب آداب سکھایا کر
میں جھوٹھی نوں سمجھایا کر
جو مورکھ ماہنوں کہندی ہے

مُونہہ آئی بات نہ رہندی ہے

واہ واہ قدرت بے پروائی ہے
دیوے قیدی دے سر شاہی ہے
ایسا بیٹا جایا مائی ہے
سبھ کلمہ اُس دا کہندی ہے

مُونہہ آئی بات نہ رہندی ہے

اس عاجز دا کیہہ حیلہ ہے
رنگ زرد تے مکھڑا پیلا ہے
جِتھے آپے آپ وسیلہ ہے
اوتھے کیہہ عدالت کہندی ہے

مُونہہ آئی بات نہ رہندی ہے

بلھا شوہ اساں تھیں وکھ نہیں
بِن شوہ تے دوجا ککھ نہیں
پر ویکھن والی اکھ نہیں
تاں ہی جان پئی دکھ سہندی ہے

مُونہہ آئی بات نہ رہندی ہے

Bulleh Shah
بلھے شاہ

Thanks to Syeda Aasma for sharing these lyrics and Link.

Youtube Arieb Azhar: Moun Aayi Baat Na Rehndi Ay