Pehlay Zara Hazoor Ko To Jaan Jaeyey
Mumkin Hai Phir Khuda Ko Bhi Pahchaan Jaeyey

پہلے ذرا حضورؐ کو تو جان جائیے
ممکن ہے پھر خدا کو بھی پیچان جایئے

ہر قول و فعل اذن الہیٰ کے تخت ہے
محبوبیت کی شان ہے قربان جایئے

ایماں یہی ہے آپ کا ہر حکم بر ملا
بے حیل و بے گماں ہی بس مان جائیے

اہل یقیں ہی صاحب ایماں ہے دوستو
جینا یہی ہے مر کے مسلمان جایئے

دنیا کی ہراک شے سے ہیں جبکہ عزیز تر
قربان ان کی ذات پہ ہر آن جائیے

دونوں جہان کی دل سے محبت نکال کر
پیش حضورؐ بے سروسامان جائیے

اُٹھو کہ اب حضورؐ ہیں تشریف لا رہے
اس ساعت حسیں کو تو پہچان جایئے

کہتے ہیں تیری نعت کو قندیل خاوری
خؔاور تری اس طرزپہ قربان جایئے

خاورسہروردی
Khawar Soharwardy

Noor he Noor Mahak Kaif o Saroor Ayay Hain
Dil e Baitaab Zara Sabr Hazoor Ayay Hain

نور ہی نور، مہک ، کیف و سرور آئے ہیں
دل بیتاب ذرا صبر ، حضورؐ آئے ہیں

چشم پر نم ہے ، طبیعت میں سکوں کا عالم
زہے!ذولفضل وکرم، رحمت و نور آئے ہیں

قدسیاں فرط اَدب سے ہیں ہر سمت کھڑے
اور ہاتھوں میں لئے جام طہور  آئے ہیں

جام پہ جام لنڈھاو کہ صلائےعا م ہے یارو
اپنے رندوں کو پلانے خود حضورؐ آئے ہیں

عاصیو! بڑھ کے پکڑ لو اپنے مولیٰ کے قدم
وہ شفاعت کو یوم النشور آئے ہیں

اپنے پلے تو نہیں کچھ بھی بجز اس کے کہ ہم
حمد اور نعت کی محفل میں ضرور آئے ہیں

ہیں تجلی گہ ربی یہ بزرگوں کے مزارات
کون کہتا ہے کہ ہم پیش قبور آئے ہیں

تاکہ ہم پر بھی ہو واجب یہ شفاعت خاور
در اقدس پہ جبھی پیش حضورؐ آئے ہیں

خاورسہروردی
Khawar Soharwardy

Jahan Bhar Ke Haseenon Se Haseen Tar Ae Haseen Tum Ho
Jamal e Zaat Ho , Noor Elahi al Aalameen Tum Ho

جہاں بھر کے حسینوں سے حسیں تر اے حسیں تم ہو
جمال ذات ہو، نور الہ العالمیں تم ہو

گنہگاران امت کا سہارا بالیقیں تم ہو
کرم ہو، فضل ہو اور رحمت اللعالمیں تم ہو

بہ جسم ظاہری زِندہ، نبی آخریں اور غیب کے عالم
ہو اُمی ظاہراً پر حامل علم مبیں تم ہو

ہو محو ہم کلامی باالمشافہ اور بے پردہ
کہ عین وصل میں بینائےذات العالمیں تم ہو

مری جانِ تمنّا ہو، مرا مقصد مرا حاصل
مرا علم الیقیں، عین الیقیں، حق الیقیں تم ہو

نقاب رخ الٹ دو اے سرور جان مشتاقاں
متاع عاشقاں ہو آرزوئےمخلصیں تم ہو

نگاہے کن بہ خستگان ملت بیضا
امیر کارواں، منزل رسا، کار آفریں تم ہو

سلام اے رہبر دوراں! سلام اے مرکز ایماں
سلام اے حامل قرآں! کہ خوددین متیں تم ہو

سلام اے کار ساز و دستگیر ناقص و کامل
طبیب ہر مرض ، چارہ گر قلب حزیں تم ہو

سلام اے جان عشاقاں، سلام اے روح جاں بازاں
منور کر دو دل مرا کہ نور اولیں تم ہو

سلام اے شاہکار حق! سلام اے پیکر رحمت
سلام از خاورعا جز کہ میرے بس تمہیں تم ہو

خاورسہروردی
Khawar Soharwardy

Meray Ishq Ki Hai Azmat Tera Sang e Aastana
Hai Yehi Mera Nasheman Hai Yehi Mera Thikana

مرے عشق کی ہے عظمت ، تیرا سنگ آستانہ
ہے یہی مرا نشیمن، ہے یہی مرا ٹھکانہ

سر پردہ سرا سے ہے ظہور کنز مخفی
کہ جہاں میں پھیل جائے تیرے حسن کا فسانہ

کسے ہمسری کا وعوی، کسے سروری کا یارا
کہ ہو انبیا میں یکتا تو رسل میں یگانہ

تیری رحمتیں سراپا ، تیری شفقتیں سرا سر
تری بخشش وکرم کا ہے معترف زمانہ

اُمت کے عاصیوں کا ، ٹوٹے ہوئے دلوں کا
واللہ یہ سبز گنبد ہے آخری ٹھکانہ

تو خدا کی ہم پہ رحمت ، تو خدا کا ہم پہ احساں
کہ تمیں سے ہم نے پایا یہ عرفان کا خزانہ

مجھے کیا غرض زماں سے ، مجھے کیا غرض مکاں سے
مری آرزو تمہیں ہو اے نور دلبرانہ

گہے سوزش محبت ، گہے صبر نا شکیبا
غم عاشقی سلامت، ہے یہ قرب کا بہانہ

تیرا غم میر ا مداوا، تیری یاد میرا حاصل
کیا عجب کہ رنگ لائے میرا عشق والہانہ

وہ جذب و شوق مضطرکہ لی چوم چوم جالی
اسی جذب میں ہے مضمر ، میرے عشق کا فسانہ

یہ سگ در قلندر یہ بہ عرف عام خؔاور
تیرے در کا ہے گداگر اور فقط ترا دوانہ

خاورسہروردی
Khawar Soharwardy

Azal Ka Woh Sirr e Nihaan Allah Allah
ازل کا  وہ سرِّ نہاں اللہ اللہ

ازل کا  وہ سرِّ نہاں اللہ اللہ
ترے دم قدم سے عیاں اللہ اللہ

یہ رشتہ عبد اور معبود واللہ
نفس  در نفس کن فکاں اللہ اللہ

یہ ہمت، یہ قدرت یہ شان تصّرف
یہ تسخیر کون و مکاں اللہ اللہ

کلام محمد—————کلام الہٰی
یہ حسن کلام و بیاں اللہ اللہ

ملا ئک کو ہے رشک اہل زمیں پر
کہ ہے یاں تیرا ٓستاں اللہ اللہ

حقیقت کھلی جس گھڑی لا الہ کی
ملا بے نشاں کا نشاں اللہ اللہ

ہے تیری بدولت عجب شانِ امت
کہ خیر الامم در جہاں اللہ اللہ

میں کلمہ طیب پہ قرباں کہ اس میں
تیرا نام ہے ہم عناں اللہ اللہ

ہے تو جن کی دنیا،ہے تو جن کا عقبی
وہ سوئے مدینہ رواں اللہ اللہ

سفر میں ،حضر میں، نظر میں ، خبر میں
تیرا ساتھ ہو جانِ جاں اللہ اللہ

تمنّا ہے خؔاور  درونِ لحد بھی
کہے دل “محمد” زباں اللہ اللہ

خاورسہروردی
Khawar Soharwardy